Шымкент теміржол ауруханасының терапия бөліміне  Арыс қаласында болған төтенше жағдай салдарынан зардап шеккен 50  адам орналастырылды деп жазады Qamshy.kz ақпарат агенттігі. Бұл туралы  Шымкент теміржол ауруханасының директоры Жадыра Агишанова хабарлады. 

–Дәрігердің қадағалауын қажет еткен адамдардың басым бөлігі  аналар мен балалар, қан қысымы  және дене қызуы көтерілген Арыс қаласының тұрғындары. Атап айтқанда,  аяғы ауыр  3 келіншек, оның бірінің айы-күні келіп отырған көп балалы ана, 14 жасқа дейінгі 17 бала,  бірі – бес айлық сәби.  Одан бөлек,  аурухана мамандары теміржол вокзалында,  орталық мешітте және 56 мектепте  шоғырланған халыққа алғашқы медициналық көмек көрсетуде.  Жалпыға ортақ мәселе құжаттарының және медициналық, алмасу карталарының болмауы.

Екі күн ішінде  500-ге жуық тұрғын   дәрігердің көмегіне  жүгініп, оның 200-ге жуығына Шымкент теміржол ауруханасының мамандары дәрі-дәрмекпен қамтамасыз етіп, өз бақылауына алды.  Қан қысымының көтерілуі, қан құрамындағ қант мөлшерінің артуы, балаларда ауыз қуысының  шырышты қабатының қабынуы, дене температурасының көтерілуі сынды белгілер кездесуде.  Сондай-ақ  гигиеналық құралдармен,  қажет киім-кешекпен  және     тамақпен қамтамасыз ету мәселесі басты назарда, - дейді Шымкент теміржол ауруханасының директоры Жадыра Агишанова.

.